Instinct
ایندا سِدھا سادھا مطلب جَبلت تھیندے۔ اے ہک لاطینی لفظ instinguere کنیں بݨئے جیندا مطلب prick تھیندے۔ ایں حوالے نال instinct دا معنی تھیسی something pricked”” ۔ لفظ instigate دا لفظی معنی وی prick تھیندے۔ Prick دے معنی چُھبووݨ، چھید یا سُوراخ کرݨ، نشان لاوݨ، گھوڑے کوں ایڑ لاوݨ، سوئی نال سوراخ کر کنیں کہیں شے تے کجھ لکھݨ یا ڈیزائن بݨاوݨ تھیندے۔ لہذا جَبلت کہیں انسان دی کہیں اینجھیں عادت، فطرت یا خواہش ہوندی ہے جیڑھی اوندے اندروں prick کر ݙتی ڳئی ہووے۔ صوفی محمد سرفراز خالد صاحب prick دی نسبت نال جبلت دے معنی “کھپوتے” کریندن۔ ہک ݙِینہہ صوفی صاحب فرمائے انسان دیاں ݙو وݙیاں جبلتاں کھپوتے کنیں شروع تھی کنیں کھپوتے تئیں َونڄ مُکدن۔ میں عرض کیتے انہیں دے ناں تاں گِھنو۔ صوفی صاحب فرمائے ہک تاں ایہا کھاوݨ پیوݨ والی ہے جیڑھی بندے دے سَنگھ کنیں شروع تھیندی ہے۔ اڳوں صوفی صاحب چپ کر ڳئین تے ہک ٻئی مثال دا ذکر کیتے نئیں۔ آکھے نئیں چھوٹے ٻالیں دا کھیر پیوݨ ݙیکھ گھنو۔ اے ماء دے نِپلز دے کھپوتے کنیں شروع تھیندے تے ٻال دے سَنگھ تیں وَنڄ مُکدے۔ میں ݙوجھی وَݙی جبلت دا پچھے تاں صوفی صاحب خاموش تھی ڳئین، کجھ دیر بعد فرمائے نئیں، ” جبلتاں کھپوتے ای ہَن تے کھپوتے سوکھے بند نئیں تھیندے۔”
نوٹ: اے اتوں ݙتے انگلش لفظ دی جانچ پڑتال تے پرکھ پرچول زبیر احمد دی 2001 وچ چھپی کتاب ” حرف حَمیل” کنیں ہے۔ اساں ایں کتاب وچ ݙتے انجو انج انگلش لفظیں دی پڑتال کوں ہک ہک کر کنیں سنگت نال سانجھ کیتی رکھسوں،