اساں کوݨ
سرائیکی ڈجیٹل لائبریری سرائیکی لوک سانجھ دا اہر ہے۔ سرائیکی لوک سانجھ 1986 وچ بنگلہ کورائی وچ ٹھہیجی ہئی۔ ایندا ارتھ سرائیکی وسیب وچ سیاسی کلچر دا اینجھا ودھار ہے جیندے نال سرائیکیں دے لسانی، ثقافتی، معاشی تے سیاسی حقوق دی رکھ تھی سڳے۔ سرائیکی ڈیجیٹل لائبریری دا ارتھ سرائیکی ٻولی دے رڄے کڄے ادبی ورثے کوں ڈیجیٹل پلیٹ فارم نال ڳنڈھ کنے اوندا ودھارا کرݨا ہے۔
سرائیکی ڈیجیٹل لائیبریری دے کتاباں دے سیکشن وچ پرکھ پڑچول، سرائیکی شاعری اتے ناول تے کہاݨیاں دیاں کتاباں ہِن۔ ہک سیکشن سرائیکی میگزینز کیتے بݨایا ڳئے۔ جیندے وچ ٻنہاں میگزیناں دے نال نال سرائیکی لوک سانجھ دا تاند چھپیندڑ “سُنڄاݨ” جرنل دے ایڈیشنز وی ہِن پئے۔ ایندے کنوں ہٹ کے ہک چلدڑ بُلاگ سیکشن ہے جیندے وچ لُنڈیاں لکھتاں، کہاݨیاں، اتے کہیں ٻئی ٻولی کنوں سرائیکی اُپترائیت چھپدین۔ ویڈیوز سیکشن وچ سرائیکیں سوجھواݨیں اتے سرائیکی تحریک دے اڳواݨیں دی ڳالھ مہاڑ، وسیبی اہر دیاں ویڈیوز اتے ڳاوݨ لڳدن۔
ایں سارے آہر پچھوں منڈھلا ارتھ ایہو ہے جو اڄوکے ٹیکنالوجی دے دور اچ سرائیکی سِکشا کوں شاگردیں، سکالریں اتے شونقی سرائیکی پڑھوکیں کیتے اینجھیاں لکھتاں گھن آوݨ جیڑھیاں یا تاں پرنٹ تھیوݨ بند تھی ڳئین یا کتھائیں پریں ذاتی لائبریاں اچ کھنڈ پھُنڈ ڳئین۔ مارکیٹ تاں اویں وی سرائیکی کتاباں دی نہ ہووݨ کار ہے۔ تہوں اساݙا اے کم بݨدے جو اساں ڄتلا تھی سڳے انہیں لکھتاں کوں ڈیجیٹلائز کروں، سرائیکی لکھاریاں دا تھیا پورھا بچاؤں تے اینکوں ننویں پیڑھی تائیں پُچاؤں۔ بھل اے یکا کم اساں کلہے نئیں کر سڳدے۔ ایں کیتے تساں ڄئیں سنگتیاں پاسیوں بھڑاوݨ دی لوڑھ ہے۔
تساں بھلا کیہ کر سڳدے ہاؤ؟ ڄے تہاڈے کول کوئی وی سرائیکی کتاب یا میگزین ہے تساں اونکوں سکین کر کے اساکوں ہیٹھوں ݙتے ڳئے ای میلز تے پٹھ سڳدے ہاؤ۔ کتاباں دے نال نال ڄے تساں ٻلاگ سیکشن کیتے لکھݨا چاہندے ہاؤ تاں او وی مُنڄ سڳدے ہاؤ۔
سرائیکی پڑھو۔ سرائیکی لکھو!
info@siraiki.com
siraicom7@gmail.com