میکوں ایں ڳالھ دی خوشی ھے جو سرائیکی لٹریچر اچ ننویں شاعری دی جیہڑی بݨیاد اَساں رَکھی ھے اونکوں نوجوان شاعراں چھڑا سنبھالا نئیں پر اونکوں اپݨی سُدھ نال اڳوھیں ٹور ݙتی ھے اَتے ساݙے کنوں ھک پوڑی اُتوں چَڑھن۔ ساکوں اساݙے جیوݨ جی اچ اے خوشی ݙیون والے نوجواناں شاعراں کوں اَساں سَت سلام آھدوں۔ ایں قافلے شامل ھک نُشابر ناں سئیں حمزہ ھاشمی دا ھے جنہیں اپݨی شاعری نال وسیب دے نوجواناں کوں متاثر کیتے اتے ساݙے کنوں شاباشی گِدھی نیں۔ او اعلی تعلیم یافتہ ھن۔ اُنہاں الیکٹریکل انجنئیرنگ اچ ڈگری گیدھی ہوئی اے۔ انہیں دا سانگا کبیر والہ توں ہے۔او تخلیق کار دے نال نال عالمی ادب دا ترجمہ وی کیتی رَکھدن جیڑھی عمر شُغل پاݨی دی ھے اوندے اچ او ایہو کم کریندن۔ اے وصف ٻہوں گَھٹ نوجوناں اچ ھوندے۔ اُنہیں دی شاعری ٻہوں ڈونگھی ھے۔ اوندے اِچ او اپݨے سینگیاں کوں سِِدھی مَت لائی رَکھدن۔ او طویل نظم لکھدن اتے جو آکھݨا چاھندن اونکوں پورے پچھوکڑ نال ھک فلسفی تے گرو وانگ سمجھیندن۔ میݙی اُنہیں نال میل ملاقات کوئی نئیں۔ٻس نیٹ تے اُنہیں دیاں نظماں پڑھ تے واہ واہ کیتی رَکھدوں۔ اَساں انہیں دی شاعری دا آدر کریندوں اتے نو لکھ سلام پیش کریندوں۔ انہیں دی ھک سڄی لکھی نظم پڑھو۔
( فریدݨ یار سانگے )
تیݙی جوڳ دے صَدقوں جوڳ لَدھی
تیݙی مُرلی سݨ مَن مُور نَچے
تیݙی اَکھ چوں روہی دان تھئی
تیڈے پندھ چوں کیچ بھَنبھور لَدھے
جتِھ ٹوبھے ہِن، جتِھ دیرے ہن
تیݙی نازو نازک ڄٹیاں دے
اَساں پیرو راݨے بَھج پئے ہئیں
کَنیں سُݨ کِڑوا انہاں مٹیاں دے
گھلی پیت ہووے، مَن مَیت ہووے
ایں رِیت چوں لیہہ، اَساں آپ لَدھی
تیڈے راہ چوں راہ پئے پُھٹدے ہن
تیڈی “الفوں” ب ، اَساں آپ لَدھی
ایں خلق کوں ٖیکھ ہاں دنیا چوں
کیویں کوٹ مٹھآ تئیں آندی اے
کل کافی جَڳ دی سانجھ وچوں
کٹھے لوک سرائیک دے ٻاہندی اے
کوئی کیا آکھے , کوئی جاݨے
کتھ بھید اسرار دا کُھلدا اے
جیہڑی دَھکڑے دھوڑے کھاندڑی اے
اوکوں کتِھ وَنڄ مَحرم مِلدا اے
نَویں ویلے وچ اوویں نَویں اے
تیڈی گال دَلیں توں مِٹی نئیں
چودھار انگریزی تھاݨے ہن
چڑھ ، تخت لہور دی پِھٹی نئیں
تیݙے رانجھݨ مُکھ دی لاٹ وَلا
اَنج ، قاتل تے مقتول کرے
تیڈی رَتھ نال رَتھ، اساں ٹورݨی اے
” جے یار فرید قبول کرے “