اساں سرائیکی معشوقیں وانگ گلے شکوے دے شوقی تے محبتی ہئیں۔ اوں ریت موجب پیپلز پارٹی کنیں مجوزہ آئینی ترمیم وچ سرائیکی صوبہ شامل نہ کرݨ دا گلہ وی بجا ہوسی۔ پر پالیٹکس تے خاص کر پاور پالیٹکس معشوقی کنیں اڳوں دا مقام ہے۔ ایندی سوجھ بوجھ انُہیں کوں وَدھیک ہوندی ہے جیڑھے ایں کھیݙ وچ سر دے سودے کیتی ودن، بندے کُہائی مرائی ودن۔ایں سانگے بلوچیں۔ سندھیں تے پختونیں کنیں کجھ حال گھن گھنیجے۔ سرائیکی تاں ایں ریاست دی پاور پالیٹکس وچ بانبڑے ݙیندے وَدن تے ٻلکے ہتھ مریندے پائین۔ اِنہیں کوں تاں اپݨے راہ رستے دی وی پوری سُرت سنڄاݨ تے بھال سمبھال کائیں نی۔
میݙی سمجھ بوجھ موجب تاں سرائیکی صوبہ اوں ویلھے بݨ سڳدے جݙاں ایں مملکت خداداد وچ پارلیمانی سپرمیسی ہوسی۔ پیپلز پارٹی دی پارلیمانی سپرمیسی دی دریگھی لڑائی ہک طرانح نال سرائیکیں دا راہ رستہ ای پدھرا کریندی پئی۔ ٖݙوجھے شبدیں وچ پارلیمانی سپرمیسی وچ اِن۔ڈائریکٹ سرائیکی صوبہ دا ای کم ہے۔
سرائیکی ہک پراَمن تحریک ہے جئیں وسیب وچ کلچرل نیشنلزم تاں ودھائے پر پولیٹیکل نیشنلزم کیتے ایندے کولہوں کوئی ڈھنگ ڈھالا، راہ رستہ تے سمجھ بوجھ نئیں۔ ٻس کجھ نہ کجھ اندھارے وچ ٹٹارے مریندے پئین۔ سرائیکی وانگ کہیں وی پراَمن تحریک دی سوبھ ڈیموکریسی تے پارلیمانی سپرمیسی نال ای تھی سڳدی اے۔ الیکشن تھیندے رہون، ڈیموکریٹک پروسس چلدا راہوے تاں سرائیکی اپݨی سرت سنڄاݨ نال اپݨی اَلاوݨی تے اپݨے ووٹ نال صوبہ گھن ای گھنسن۔ انڈیا وچ ایں ڈیموکریسی کارݨ ای ایتلے ننویں صوبے (سٹیٹس) بݨن۔ ایہو کجھ پاکستان وچ وی تھیسی جے ڈٰموکریسی تے پارلیمانی سپرمیسی قائم تھی ڳئی۔
چلو پیپلز پارٹی کنیں تاں ہر ویلھے سرائیکی صوبہ دا سوال چاتا ویندے تے پیپلز پارٹی دے پلڑے وی کجھ ناں کجھ آئینی تے پارلیمانی کم آندے۔ پیپلز پارٹی سرائیکی صوبہ دا پارلیمانی کمیشن بݨائے، پنجاب دی صوبائی تے نیشنل اسمبلی کنیں قرارداداں پاس کرائن، سینٹ کنیں آئینی ترمیمی بل پاس کروائے۔ سرائیکی صوبے سانگے گلابی چھڑکاؤ وی کر گھندی ہے۔ مطلب سرائیکی صوبہ دی تھولی ٻہوں جیڑھی آئینی پارلیمانی بݨیاد پئی اے، او پیپلز پارٹی ای ہے۔ ایندے مقابلے ٻنہیں کیا کیتے۔
پی ٹی آئی تاں باقاعدہ سو ݙینہہ دا وعدہ کر کنیں آئی تے پورے ساڈھے ترائے سال بُھل ڳئی۔ اے ریکارڈ تے ہے جو پی ٹی آٗئی دے دور وچ جݙاں سرائیکی صوبہ دا نیشنل اسمبلی بل آیا تاں پیپلز پارٹی آکھیا جو او ایں بل دی حمایت کریسی۔ پر پی ٹی آٗئی اوں بل کوں قانون تے انصاف دی سٹینڈنگ کمیٹی کنیں ٻاہروں ای نہ نکلݨ ݙتا۔شاہ محمود قریشی دیاں آوݨیاں ونڄݨیاں تے گلاں باتاں ای رییہہ ڳیاں۔ آئینی بل کڈاھیں اسمبلی کاؤنٹنگ کیتے پیش نہ تھیا۔
اے اوں ویلھے وی پیش نہ تھیاں جݙاں عدم اعتماد پاروں پی ٹی آئی دا چل چلاؤ بݨ ڳیا تے سرائیکی صوبہ دا بل اوندے کیتے ہک ٹرمپ کارڈ بݨ سڳدا ہئی (پی ٹی آئی دی ایں چک پک سمجھݨ کیتے کوئی راکٹ سائنس دی لوڑھ نئیں)
چلو گذری وہاݨی کوں چھوڑوں۔ اڄ وی پی ٹی آئی اسمبلی وچ ہے۔ او آکھے چا جو اوندی پاسیوں آئینی ترمیمی بل وچ سرائیکی صوبہ دی شرط ہے۔ ایں طرانح نال پی ٹی آئی کیتے نانگ وی مر ویسی تے کاٹھی وی نہ ترٹسی۔ مطلب سرائیکی صوبہ کہیں صورت مسلم لیگ (ن) کوں قبول نہ ہوسی تے پوری آئینی ترمیم ہک طرانح نال چیلنج تھی ویسی۔ یا کم از کم پی ٹی آئی دی ایں آفر نال پیپلز پارٹی تاں گندی تھی پوسی جے او ایں مطالبے دی حمایت نہ کریسی۔ پی ٹی آئی جیویں جنوبی پنجاب صوبہ محاذ بݨا کنیں اونکوں لِم لیٹی کیتا، اوھو کجھ او ہݨ کریسی۔
مسئلہ اے ہے جو ہک فاشسٹ رائٹ ونگ پارٹی دی حیثیت وچ پی ٹی آئی جمہوری سیاست نئیں کرݨ چاہندی۔ او چھڑا آرمی تے سپریم کورٹ جہیں ادارے ہتھیکا کر کنیں صدراتی نظام گھن آوݨ چاہندی ہے، ہک سنواں نصاب بݨاوݨ چاہندی ہے، ریاست مدینہ تے طالبان نال گٹھ جوڑ چاہندی ہے۔ اوندا جمہوری وفاقی پارلیمانی سیاست دا کوئی ارادہ ای نئیں۔
سرائیکیں کوں ہک لنگ ول ݙیکھݨا پوسی جو انہیں دا کیا راہ رستہ ہے۔ ساکوں تاں چھڑا پارلیمان، پارلیمان تے پارلیمان ای نظردی ہے تے او اڄاں ہک پاسیوں اسٹیبلشمنٹ تے جوڈیشری دی ݙو مکھی بھیڑی دے چک وچ ہے تے ٻئی پاسیوں پی ٹی آئی دی بودگی دا شکار ہے۔ ایں طرانح تاں سرائیکیں کیتے دیڳ وچ کجھ نئیں پکݨا۔