سرائیکی ڈیجیٹل لائبریری

پوسٹ ماڈرن پیروڈی (Postmodern Parody)

1۔ ہک ہتھ تیں اے خیال کیتا ویندے اساں بیانیے اتیں تصویری نمائندگی(Representation) دی لمبی روایت دے بار ہیٹھوں نئیں نکل سڳدے۔ ݙوجھے ہتھ تیں ساݙا پہلے کیں موجود نمائندگی دی لامحدودیت اتیں اݨ کھٹ طاقت توں وی اعتبار اٹھدا ویندے۔ اینہ تضاد دی پوسٹ ماڈرن شکل دا ناں پیروڈی ہے۔

2۔ پوسٹ ماڈرن پیروڈی ماڈرنسٹ روایات کوں استعمال اتیں انہیں تیں طنز کر کیں اے ݙسیندی ہے جو موجودہ نمائندگی پراݨی نمائندگی کیں کیویں نکلدی ہے اتیں (وقت دے) تسلسل تیں فرق نال کیہرے تیں کیویں نظریاتی نتائج نکلدن۔

3۔ پوسٹ ماڈرنزم نمائندگی دی سیاست سامݨے گھن آندی ہے۔ پوسٹ ماڈرن پیروڈی تاریخ دی نمائندگی دی اہمیت کوں مسئلہ (Value Problematizing) اتیں غیر قدرتی بݨیندی ہے۔

4۔ پوسٹ ماڈرن پیروڈی تاریخ دی (مخالفت تیں مبنی) نویں سِروں پڑھت نال ماضی دی نمائندگی دی طاقت کوں ثابت وی کریندی ہے اتیں ترڑیندی (Subvert) وی ہے۔

5۔ پوسٹ ماڈرن پیروڈی خود آگاہی(Self-consciousness) نال تاریخی دستاویزات دی سچائی کنوں یقین ہٹا ݙیندی ہے۔

6۔ پوسٹ ماڈرن پیروڈی تنقیدی لحاظ نال ڈی کنسٹرکٹِو (Deconstructive) اتیں تخلیقی پاسوں تعمیری (Constructive) ہے۔ اینہ تضاد موجب کہیں وی میڈیم (جیویں کہ تاریخی دستاویزات) دی نمائندگی دی طاقت اتیں حد ٻنے دا شعور ݙیندی ہے۔

7۔ حقیقت نگاری (Realism) دے ڈھالے کوں اونہ دے خلاف استعمال کر کیں نمائندگی دی پیچیدگی اتیں اوندی لُکی ہوئی سیاست کوں سامنݨے گھن آندی ہے۔ ہک سطر وچ ایہا ہے پوسٹ ماڈرن پیروڈی۔

8۔ اے ڳالھ غلط ہے جو ماڈرنزم سنجیدہ اتیں اہم ہے اتیں پوسٹ ماڈرنزم طنزیہ تیں پیروڈک(Parodic) ہے۔ اصل ڳالھ اے ہے جو پوسٹ ماڈرنزم ماڈرنزم دی حل کڈھݨ آلی تحریک اتیں خواہش، جیہری اختتام (Closure) دو گھِن ویندی ہے، کوں مسترد کریندی ہے۔ پوسٹ ماڈرنزم وچ سمجھوتہ ہر ویلے تنقید دے نال رہندے۔

9۔ عام طور تیں اے منیا ویندے جو پوسٹ ماڈرن پیروڈی غیر تاریخی اتیں غیر سیاسی گھٹیا مرکب (Pastisch) ہے۔ اے ڳالھ بالکل غلط ہے۔ پوسٹ ماڈرن آرٹ پیروڈی، ستم ظریفی (Irony) اتیں طنز دا استعمال کر کے آرٹ دی تاریخ اتیں لوکیں دی یاداشت کوں رلا کیں جمالیات دی ساخت (Form) اتیں مواد (Content) دی ول پرکھ پرچول نال انہیں دی اݨ منی ہوئی (Unacknowledged) نمائندگی دی سیاست دی نظرثانی کریندی ہے۔

10۔ طنزیہ نمائندگی دی ہک قسم ہووݨ دی وجہ کیں پیروڈی دے ݙو منہ ہین: جیہری شے دی پیروڈی ہوندی ہے اوکوں قبول وی کریندی ہے اتیں اوکوں مُݨ مُنڈھو پٹ وی سٹیندی ہے۔

11۔ پوسٹ ماڈرن پیروڈی دا طریقہ کار زیادہ تر تریمتائیت (Feminism) دے فنکار استعمال کریندن۔ اینہ دے نال او تاریخ اتیں ثقافتی نمائندگی دی تاریخی طاقت کوں سامݨے گھن آندن اتیں انہیں کوں ڈی کنسٹرکٹ کریندن۔ مزید ایہ دعویٰ کریندن جو نمائندگی دی سیاست دی تنقید نال تریمتیں کوں جیتݨ وستیں ٻہوں کجھ ہے۔

12۔ نمائندگی دی سیاست اتیں سیاست دی نمائندگی پوسٹ ماڈرن ہِسٹوریو گرافک میٹافکشن (Postmodern Historiographic Metafiction) وِچ کٹھے ٹردین۔ اینہ دے وچ پیروڈی تاریخ اتیں فن دی طنزیہ پرکھ پرچول دا ڈھالا بݨ ویندی ہے۔

13۔ پیروڈی دی ساخت ایہو جھئیں ہوندی ہے جیہری (لکھیئے ہوئے) ماضی کوں تسلیم وی کریندی ہے اتیں اوکوں پَتر وی سٹیندی ہے۔

14۔ پوسٹ ماڈرن پیروڈی وچ منیئے ہوئے تجاوز (Authorized Transgression) دی سیاست دا دوہراپن آپݨی اصل وچ قائم رہندے اتیں کوئی وی جدلیاتی حل پیش نئیں کیتا ویندا.

Author’s Note: This essay is the Saraiki translation of my notes taken while reading Linda Hutcheon’s The Politics of Postmodernism (1989).