سرائیکی ڈیجیٹل لائبریری

1۔ پوسٹ ماڈرنزم دی نظریاتی اساس 1960 دی دہائی دی طاقت دی عوامی مخالفت، تریمتیں تیں نسلی اقلیتیں دے تاریخی پرکھ پرچول وچوں آندی ہے۔

2۔ رولنڈ بارتھز (Roland Barthes) ڈوکسا (Doxa) دا خیال ݙیندے۔ او آہدے ڈوکسا عوامی رائے، قدرت دا الاء تیں اتفاقِ رائے ہے۔ لنڈا ہچن (Linda Hutcheon) اینہ تصور تیں مبنی ڈی ڈاکسیفیکیشن (de-doxification) دا تصور ݙیندی ہے۔ ہچن آہدی ہے پوسٹ ماڈرنزم وچ قدرتی، ثقافتی تیں سیاسی نظریے کوں ڈی ڈاکسیفائی کرݨ دی تحریک ملدی ہے۔

3۔ پوسٹ ماڈرنزم دا ہک پکھ ہر تصور کوں تروڑݨ ہے۔ پوسٹ ماڈرنزم دا اے پکھ سٹرکچرل ازم تیں ڈی کنسٹرکشن ازم توں آندے۔ اینہ واستیں پوسٹ ماڈرنزم دا ڈی ڈاکسافائی کرݨ آلے عنصر کوں انہیں ݙوہائیں کیں علحیدہ نئیں کیتا ونڄ سڳدا۔

4۔ پوسٹ ماڈرنزم دی فطرت پچھ ڳچھ کرݨ تیں ڈی ڈاکسیفائی کرݨ (ݙوہیں) ہوندی ہے۔

5۔ پوسٹ ماڈرنزم وچ جنہیں رسومات تیں مفروضیئیں کوں کمزور کرݨ تیں اُلٹݨ دی کوشش کیتی ویندی ہے انہیں کوں قائم تیں مضبوط وی کیتا ویندے۔ اے دوہرا پن تیں دوغلا پن پوسٹ ماڈرنزم دی نویکلی صفت ہے.

6۔ سماج وچ ڄنہیں تصورات کوں کوں قدرتی سمجھیا ویندے پوسٹ ماڈرنزم وچ انہیں کوں غیر قدرتی سمجھیا ویندے۔ پوسٹ ماڈرنزم وچ انہیں کوں قدرتی سمجھیئے ہوئے تصورات کوں ثقافتی ڳِݨیا ویندے۔

7۔ پوسٹ ماڈرنزم وچ سیاسی عمل دو گھِن ونڃݨ آلی ایجنسی (Agency) دی کوئی تھیوری کوئینی۔ اینہ دے نظریاتی بنیاد وچ تصورات کوں صرف غیر قدرتی ݙِکھاوݨ ہے۔

8۔ پوسٹ ماڈرنزم وچ ماڈرنزم تیں پرجوش یقین تیں ایمان تیں سوال کیتا ویندے۔

9۔ پوسٹ ماڈرن جیہری شے تیں تنقید کریندی ہے اوندے وِچ او آپ وی شریکِ جرم (Complicitous Critique) ہوندے۔ ایہا شے ایکوں معاشی تیں ثقافتی سطح تیں براہِ راست سرمایہ داری تیں ہیومانِزم دے برابر کھڑیندن۔

10۔ پوسٹ ماڈرنزم وچ اداریئیں (سیاسی، سماجی، اخلاقی، معاشی وغیرہ) تیں یقین دی بحالی (Restoration of Faith) دی وکالت نئیں کیتی ویندی۔ پوسٹ ماڈرنزم کجھ سوال پچھدے:
ا۔ کیہرے ادارے تیں یقین کوں بحال کرݨا چاہیدے؟
ب۔ یقین دی بحالی کیندے مفاد وِچ ہے؟
ج۔ کیا اے ادارے ساݙے یقین دے حقدار وی ہین؟
د۔ کیا اے ادارے بند تھی سگدین؟ کیا اے بند تھیوݨے چاہیدن؟
اے ڳالھ ہر ویلے یاد رکھݨ لازم ہے جو پوسٹ ماڈرنزم کہیں وی سوال دا جواب نئیں ݙیندی۔

11۔ پوسٹ ماڈرن تنقید ہمیشہ سمجھوتے تیں مبنی ہوندی ہے۔ اے یاد رکھیجے ڄو پوسٹ ماڈرنزم کہیں مسئلے دا حل نئیں پیش کریندی بلکہ صرف تصورات تیں یقین ختم کرکیں انہیں کوں پیچیدہ کر ݙیندی ہے۔

12۔ کہیں وی روایت دی پوسٹ ماڈرنسٹ تنقید بیک وقت اونہ روایت ( سسٹم) دی طاقت دا استعمال (استحصال) کرہندی ہے تیں لوکیں دے اونہ روایت بارے علم دا وی سہارا گھِندی ہے۔

Note by the author: “This essay is the Saraiki translation of my notes taken while reading Linda Hutcheon’s The Politics of Postmodernism (1989).”