لکھت: فضل رب لُند
20نومبر 2020دی شام سنگت نال وستی جیسل کلاسرہ ضلع لیہ تھل جنڈی صفدر کلاسرہ دے گھر پج گئے اے رات اساں صفدر دے گھر گزاری صلاح مشورے بعد اے طئے تھیا سویرے نران کرکے تھل گریٹر کینال دے کمانڈ ایریا وچ آوݨ والے چار وڈی رکھوک کوں ڈٹھا بھالا ونجے اتھاں ونج کے تل وطنی تھلوچڑ آجڑی جٹ نال سانجھ جوڑی ونجے سوجھا محکمہ مال تیں محکمہ جنگلات دے لوکیں نال وی ملاقات کیتی ونجے۔اے پیرا کھرا کڈھا ونجے تھل دی رکھوک دی کیویں بھولوں ونڈ کیتی ویندی پاییٗ ھے۔۔وݨ بوٹے پکھی زناوریں دا ایں بھولوں ونڈ وچ کیا حال حشر تھیسی؟
رکھوک دے جنگلات نال کیا کیتا ویسی ایندے کیتے اے طئے تھیا جو اساں اپݨی ڈیکھ بھال دا پندھ رکھ خیرے آلے کینے شروع کریسوں۔سویرے نال اساں جیسل کلاسرہ توں رکھ خیرے الی دو پندھ شروع کیتا اساں اپݨا پہلا ساہ رکھ خیرے آلی انگورا گوٹ فارم تیں ونج کڈھا جیرھا جو پنجاب حکومت کڈاہیں تھل دی بکری بھیڈ دی نسل ودھاوݨ کیتے بݨایا ھا۔
ایں ویلھے جیرھا پورا اجڑ تیں برباد تھی چکا ھا دفتر رہائشی کوارٹر بکریں بھیڈیں دے چھپرے اجڑے کھولے ڈیݨ دے جُھٹکے ڈیندے ھن اے کندھیاں جاہیں اپنڑی اجڑݨ دے نوحے خود پڑھدا کھڑا ھن اساں وی کافی دیر اپݨی اجڑی وسوں کوں روندے رہے ول رکھ دے اندروں ٹر پئے۔۔۔۔
رکھ دے ہک ٹبے ساکوں اپݨی آم شام وچ گھن گھدا جالیں دے وݨ ہک خاص پر اسراریت رکھدن جنہاں ساکوں اپݨے جادو وچ چھک گھدا ٹبے تیں ونڑیں پتہ نہیں کیا جادو کیتا جال اپݨا نوحہ کریندی کھڑی ھے کیا میں مقامی ہاں یا غیر مقامی ؟ کیا میڈا ایں دھرتی تیں وسݨ دا کوئی حق ھے یا کائینا؟ تھل گریٹر کینال دے کہیں پنے تیں میڈا قصہ وی ھے یا کائینا ؟ تے میڈا کیرھا مل پیسن میڈا کتنا مل پیسن یا وت میں ایویں مفت اجائی بھٹ تھی ویساں!!!
میڈے نال میڈا وسدا بھرا ڄنڈا کن تیں ویسی میڈی بھیݨ نماݨی بیر دا کیا تھیسی؟
کترݨ آلی خوشبو دا سودا کہیں سنڈی مار سپرے دی بدبو دے بدلے تھیسی؟
تھل دیاں تتلیاں کتھ لڈ ویسن انہاں کوں کییرھے ڈیس آباد کریسوں ؟کھپ جیرھی ست ہزار ورہیں کینے تھل وسوں دی ہر چھت کوں چھاں بخشی ھئی ایندی قمیت کیا لیسو؟؟؟ ہر وبا وچ ہرمل شودا دُکھدا رہ گئے ،تھل دی ہرہک سالھ تیں جھنبرے اندر۔۔ جو بال تہاڈے سکھ تیں سوہݨی صحت نال حیاتی ہنڈاون تھل گریٹر کینال دے کہیں پنے تیں ایندا مل کیا پیندے پئے ھن۔۔۔ بکھڑا ۔لائی۔سینوار تیں اک دا مل وی لگسی یا کائینا ؟
ڈاچی شودی کوک ڈتی میں جو ست ہزار ورہیں کینے تھل اپݨے نال وسدی آندی ہاں میڈا وسݨ مفت اجایا ویسی میڈا لانڑا اُجڑ گیا تاں میں کیا چرساں یا سرمائے دی ایں کھیڈ وچ ہر حق صرف آدم دا ھے ساڈا جیوݨ اوترا اپݨی دھرتی جیوݨ دا کوئی حق کائینی؟
ساڈے حق وچ کوئی سوجھواݨ عالم فاضل گالھ نہی کرسگدا ؟ میں وگ ڈاچیں دے روندے ڈٹھے۔
گاوڑی وی بہوں مونجھی ھئی میڈے چرنڑ دی کوئی جاہ نہ راہسی گم۔گنڈھیل۔دربھ نہ راہسی؟
بکری بھیڈ دو تر تر ڈیکھ کے آکھے بھیݨ پیاری تھل مکدا پئے جھر مکدا پئے کوئی نہ بچسی سانجھ سہیلی کال کڑچھی کتھاں ویسی تیڈے میڈے چیچڑ کیڑے کون ان چنُڑسی ؟ تیتر تلور تیں کونجاں آکھے پہلے عربیں ھاب کیتے وے پر ول وی تھل دے جھر وچ لُک ویندے ہاسے کجھ تھوڑے تاں بچ ویندے ہاسے تھل کوں پدھرا کرکے ساکوں ننگا کر کھڑائے وے!!! ھالی وی تہاڈی بکھ نہی مُکی ساڈی بولی ویچ چھوڑیسو تسبیح لولی ویچ چھوڑیسو ۔۔۔۔۔
بالیں جیکر کل کوں اے پچھ گھدا تاں تیتر دی بولی کیا ہوندی ھئی کونج کیویں کرلاندی ھئی گیرا کیویں گھوکدا ھا ول کیا ولدا ڈیسو۔۔۔؟؟ ہر شئے مار مکا کے تھل وچ سیم تیں سوما ہوسی زہریں بھریا فصلیں ہوسن تھلوچڑ نال گولݨ دے وی لبھسی کائینا۔
تھل دا جھر بلا غورکا سیہڑ چوکڑی مار کے آکھیا ساڈے ناں وی درج کراؤ تھل وچ نہر کھٹاوݨ والے ساڈے ڈکھ دا قصہ سُݨݨ ساکوں وی کجھ جیوݨ ڈیون تھل دی ریخ تیں کھیڈݨ ڈیون۔۔ٹاواں ٹاواں ہرݨ وی تھل دے جھر وچ لکدا ڈٹھا۔
گیدڑ یار وی نوک کے کوکیا مائی لومڑی وی مونجھی ھئی گیدڑ نوک کے آہدا ریہا میں تل وطنی میڈے حق دی گالھ کرو کہیں عالم کوں آکھو ہا میں تیں سنسکرت ایں وسوں تیں سینگے ھیں ساڈے حق وچ کوئی سنسکرت وچوں اکھر۔ شبد لبھے ہاں متاں اساں وی بچ پووں ہا۔۔۔۔بھاری پیریں ٹبہ چھوڑیا پندھ اگونہاں کیتا رکھ خیر آلے چھوڑ کے اساں تحصیل چوبارہ دو روانہ تھئے تاں صضدر کلاسرہ دا روح ہا تھل جیپ ریلی تھنیدی پئی ھے ایندا چکر لائی جلوں ول اساں جیپ ریلی دی مُکݨ آلی جاہ تیں پج گئے اتھاں جیپ ریلی ، ریلی کینے ہٹ کے ہک انج میلہ لگا کھڑا ہا جیندے وچ ہوٹل بازار سرائیکی لوک گاوݨ تے جھمر لگی کھڑی ھئی تیں جیپ ٹریک کینے ہٹ کینے تل وطنی لوکیں دے کپڑے دے تمبو لگے پئے ھن ریت دے ٹبیں تیں رنگ برنگ کپڑیں دی رنگیں دی ہک بہار ھئی ڈوجھی پاسوں گھڑ سوار تیں نیزے بازی دے مقابلے ھن لوک وڈی چس رس نال نیزے بازی دا مقابلہ ڈیہدے کھڑے ھن۔اساں وی گھنٹہ ڈو میلے دے رنگ وچ رنگیج گئے ول خیال آیا جو اپنڑا پندھ اگونہاں کرو میلے دی عارضی ہوٹل تیں چاہ پیتی ول اے فیصلہ تھئیا جو آج دی رات تھل نواں کوٹ سنگتی سئیں کُمیل مگسی دے ڈیرے تیں گزریندے ھئیں باقی دا سفر اگلے ڈینہہوار شروع کریسوں ۔اتھاں پنُے تاں رات تھی چکی ھئی پورے ڈینہہوار دی تھکاوٹ دے نال نال خیرے آلی دی مونجھ وی نال نال ودی ھئی یار بیلی تازہ دم تھیوݨ کیتے منہ ہتھ دھووݨ پئے گئے تھوڑی دیر بعد رات دی روٹی آگئی چسولی روٹی دے کھاوݨ دے بعد مارکے دی صلاح بݨی کجھ دیر ٹر پھر گھنوں۔
اساں باہروں نکھتے تیں ڈہلائی پاسے ٹر پئے فرلانگ ڈو دی واک کیتی بٹ شٹ وی لگدی راہی واپس وساخ تیں پج گئے تیں ساڈے میزبان دی وساخ مہمانیں کینے بھری پئی ھئی لیکن ساڈے بسترے ول وی خالی پئے ھن اساں آکے بستریں تیں لیٹ گئے کھل بٹ وی لگی رہی بسں جیکوں جیویں نندر امدی گئی او سمدا گئے سویرے ویلھے نال اٹھی کے تیاری کیتی نران پاݨی کرکے اساں اپݨے میزبان کینے اجازت گھدی تیں رکھ چھکݨ دو ٹر پئے تیں چھکݨ آ لیں جانڑو سنگت نال فون تیں رابط کیتا
اساں تھل اندرون دی سڑک گھدی جیرھی جو نواں کوٹ کینے رکھ چھکن وچوں تھنیدی پٹی بلندہ کوں ملنیدی ھئی تھل دا منظر کہیں جادو کینے گھٹ نہیں قدرت دی اپݨی ہک رنگا رنگی ھے تھل وچ عجب مراقبے آ لی چپ ھے۔
تھل دا منظر تہاڈی اکھ نہی جھمکݨ ڈیندا مستقل تہاکوں ہک حیرت دے جہان وچ رکھدے قدرت دی ایں ڈرائنگ تیں بارانی چݨے دی فصل دی چتر کاری ایں منظر کوں وادھوں سوہݨا کر ڈیندے ۔ ریت دے اُچے ٹبیں تیں جھکیں وچ ایویں لگدے جیویں کوئی ساوی قالین سٹ گیا ہووے ،اندرون تھل وچ پکی رابطہ سڑک تیں سفر کریندیں تہاکوں اے تجربہ لازمی تھنیدے جو تھل وچ ٹبے کیویں ٹردے رہ ویندن پکی سڑک تیں ویندے ویندے ہک دم منظر تبدیل تھیا ویندے سڑک تیں ریت دا ٹبہ آ ویندے جیرھا 50فٹ تک اچا ہوندے تیں سڑک کوں وی کراس کرگیا ہوندے ایویں لگدے بس پکی سڑک اتھاں ختم تھی گئی ھے لیکن تساں ول جو ٹبہ پھر کے آ ندے ہاو ول منظر تبدیل وت پکی روڈ تیں تھل دا بئیا رنگ
تھل دے اتنے رنگ تیں انگ ھن جیرھے بندے کوں ہک دفعہ گالھا کر ڈیندن ،ایویں ہک دم ساڈے سفر دے دوران تھل اپݨا رنگ بدلے چݨے دی فصل ختم صاف ٹبے ختم ہک جھر شروع تھی گیا بھیڈاں بکریاں گائیں ڈاچیاں چردیاں نظر آ یاں تیں ہر ٹبے دی چوٹی تیں پنج ست چھیڑو آجڑی اپݨی کچھاری لائی بیٹھے ھن میں سنگت کوں ڈسیا جو رکھ چھکن شروع تھی گئی ھے۔
پٹواری صاحب دے فون تیں رابطہ کیتا تاں پٹواری لہور گیا ودا ھا لیکن پٹواری صاحب آ کھیا تساں جو وی پُچھݨے فون تیں پُچھ گھنوں میں تہاکوں رکھ بارے سب کجھ ڈسا ڈینداں ۔
اساں ہک ٹبے تیں پُجے تاں اتھاں چھیڑو آ جڑی اپݨی کچاری لائی بیٹھے ھن مارکے نال خیر ست کیتی تے نال بہہ گئے ہک ڈوجھے کوں جاݨ سنجاݨ کرائی تیں گپ شپ ٹر پئی تھل دا حال احوال چاتا گزر گزران دا پچھیا مارکے بہوں کھل کے حال احوال ڈتا ڈسیا جو نال ساڈی وستی ھے جنیدا ناں وستی چھکݨ ھے اتیں اے رکھ چھکݨ دے رقبے وچ ھے ساڈی وستی دی وڈی گزران ڈھور ڈنگر تیں بھیڈ بکریاں ھن جیرھاں اساں پورا سال ایں رکھ وچ چریندے ھیں بور پیٹر دے پاݨی نال مال منی دا تھوڑا بہوں گھاہ رہا گھندے ھیں تیں اپݨی گزران جوگی کݨک وی کاشت کریندے ھیں اساں اپݨی گزران وچ بہوں خوش ھیں۔
اساں پُچھیا مارکا تھل وچ نہر آ ندی پئی ھے اوندے بارے کیا خیال ھے نال بیٹھے ہک پکی عمر دے چھیڑو چاچے نورے ٹھڈا ساہ کڈھ کے آ کھس بچڑا اے نہر سئیں مویی ساڈے کیتے تاں نہی آندی پئی اساں تاں پہلے ڈھیر سارے ذلیل تھنیدے پائے ہاسے جڈاں رکھیں دی ڈھیر ساری زمین فوجیں کوں الاٹ کر ڈتی ہانیں او ہُݨ ساڈے نال جھیڑا تماشہ کریندن ساڈا مال کھلا نہی چرݨ ڈیندے جیکر اتھاں باقی رقبے تیں نہر آ گئی تاں اساں کڈیں مرسوں ساڈے مال ڈنگر بھیڈاں بکریاں کتھاں چرسن اساں تاں بہوں اوکھے تھی ویسوں ،انہاں وچوں ہک نوجوان منور وی ہا اونہہ حال ڈتا ساڈی وستی دے کجھ مکان وی نہر وچ آ ندے پئین تیں ساڈے نال اگلی وستی جیندا ناں وستی تھند ھے پوری دی پوری نہر وچ آ ندی پئی ھے تساں میڈے نال ساڈی وستی جلو اتھاں میں تہاکوں چاہ وی پلویندا تیں باقی لوکیں نال وی تہاڈی میل ملاقات وی کروینداں اساں اوندے نال اوندی وستی لگے گئے اساں اوندے دیرے تیں بہہ گئے او چاہ دا آ کھݨ گھر لگا گئے وستی دے باقی لوک وی ساکوں ملݨ آ گئے، جاݨ سنجاݨ تھئی ، تھل تیں نہر دے بارے گالھیں شروع تھی گیا ایں دوران منور ساڈے کیتے چاہ تیں ابلے انڈے گھن آ یا منور نال مزید گپ شپ تھئی تاں منور ڈسیا میں پڑھدا پئیاں کورونا دی وجہ کینے کالج بند ھے ات گالھوں میں ڈینہہ کوں اپنڑا مال رکھ وچ چرا امدا اساں پچھیا کیرھی جماعت وچ پڑھدے ہاؤ انہاں ڈسیا میں منکیرہ کالج وچ ایف اے کریندا پئیاں منور ڈسیا میڈا ہک سوتر ھے او نہر دے بارے ڈھیر جاݨ دے اوندی روڈ تیں دوکان ھے اوندے نال ملدے ھیں اساں آ کھے ٹھیک ھے اوکوں ملدے ھیں اساں اوندے کولوں پج گئے اوندے نال حال احوال شروع کیتا
اونہہ ڈسیا جیرھے ساڈے ملکیتی رقبے نہر وچ آ ندے پئین سرکار انہاں دا معاوضہ پنتالی ہزار فی ایکڑ ڈیندی پئی ھے اساں پچھیا ایں ویلھے رقبے فی ایکڑ مارکیٹ ریٹ کیا ھے انہاں ڈسائے مارکیٹ ریٹ فی ایکڑ اڈھائی لکھ کینے ترائے لکھ تک ھے،ول پچھیا لوکیں کوں معاوضہ مل گئے انہاں ڈسائے کجھ لوکیں گھن گھدے تیں ڈھیر ساریں لوکیں اتنا تھوڑا معاوضہ گھنݨ کینے انکار کر ڈتے،دوکان دے نال وستی تھند ھئی جیندی آ بادی تقریباً ڈاہ کینے پندرہ گھر ھن نہر ایں وستی دی ادھ وچوں گزدی پئی ھئی پوری وستی تھند بیدخل تھنیدی پئ ھئی لیکن نہر دے کہیں کاغذ پتر وچ ایں وستی دا کوئی ذکر کائینا ھا جو انہاں کوں ولدا کتھاں وسایا ویسی پوری وستی وسوں اجاڑݨ دا کیا معاوضہ ڈتا ویسی لوکیں شودیں کوئی سدھ کائینا ھئی اساں کیڈیں ویسو ں ،ساڈا کیا بݨسی ، وستی دے لوکیں نال تھل دی وادھوں جاݨ کاری کیتے گالھ اگوں ٹوری ہک نوجوان جیندی لوݨی تیلی دی دوکان ھئی آ کھیا پورے تھل وچ زیر زمین پاݨی چھی کینے ست فٹ تک آ گئے او وی مٹھا اے ول نہر کیرھے مقصد کیتے آ ندی پئی ھے ایں نہر نال تاں تھل دا مقامی بندہ تھل کینے بیدخل تھی ویسی زمیناں ریٹائر فوجی تیں غیر مقامی بندیں کوں الاٹ تھنیدیاں پئین
نہر نال پورا تھل سیم تھی ویسی پورے تھل دا حسن تباہ تھی ویسی
لوک ایں نہر دے حوالے نال بہوں مونجھے ماندے ھن بہوں ڈکھی ھن
مارکے نال حال احوال کرݨ دے بعد اساں پٹی بلندہ آ لے پاسے روانہ تھئے پٹی بلندہ دے ہک سنگتی سئیں قلب شاہ نال فون تیں رابط کیتا تاں پتہ لگا شاہ صاحب لیہ ہک شادی وچ گئے ودن شاہ جی معذرت کیتی تیں ہک ریٹائر پٹواری دا فون نمبر ڈتا جو اے تہاکوں رکھ “بابا ہوندا لال” بارے مکمل معلومات ڈیسن ،پٹواری صاحب دے فون تیں رابطہ کیتا تاں پٹواری لہور گیا ودا ھا لیکن پٹواری صاحب آ کھیا تساں جو وی پچھنڑے فون تیں پچھ گھنوں میں تہاکوں رکھ بارے سب کجھ ڈسا ڈیندا۔
پٹواری نال رابطے دے بعد اساں منکیرہ شہر دو سفر شروع کیتا بُڈدی دیغر ھئی سجھ لاٹ پلاٹی ھا ڈینہہ لہݨ دے منظر تھل دے منظر کوں مزید دل فریب کرڈتا ھا، ڈینہہ کوں دُھپ وچ تھل دے جیرھے ٹبے چاندی دے لگدے پئے ھن ہُݨ سجھ دی لالی دے نال سونے دے لگݨ پئے گئے ھن۔
منکیرہ تئیں پُجدیں ساکوں عشاء تھی گئی منکیرہ پہنچ کے صفدر اپݨے ہک سنگتی نال رابطہ کیتا جو اساں رات منکیرہ گزراݨی ھے ساڈے جاہ ٹکاݨے دا کویی ترلہ کرو۔ او سنگتی تاں منکیرہ کائینا ھا اونہہ ساکوں اپݨے ہک سنگتی دا نمبر ڈتا جو تساں ایندے نال رابط کرو اے تہاڈی رہائش دا انتظام کر ڈیسی اوندے نال رابط تھیا تاں انہاں اپݨے ڈیرے دا پتہ سمجھا ڈتا ۔
اساں اوندے ڈیرے تیں پج گئے او منکیرہ دا مقامی زمیندار چھینہ تھنیدا ھا اساں رات گزاری تیں سویرے نران پاݨی کرکے اساں رکھ “بابا ہوندا لال “وستی چھینہ دو پندھ شروع کیتا میڈا ہک ڈو چکر پہلے وی وستی چھینہ لگ چکا ھا فون تیں رابط کیتا مارکے اکھیا تساں پہنچو اساں تہاڈا انتظار کریندے پئے ھیں اساں تھوڑی دیر بعد وستی پہنچ گئے
مارکا کھٹے تھئے بیٹھے ھن اساں سلام ونج کیتا مارکا حال احوال شروع کرڈتا پندرہ بندے ہوسن جیندے وچ نوجوان بڈھڑے پکی عمراں دے لوک ھن،رکھ دے حوالے نال گالھ تھئی مارکا پورے تھئے بیٹھے ھن دھاڑ دھاڑ کیتی ہنیں برباد تھی گئے ھیں اساں آ کھیا ہک ہک جݨا گالھ کرو تھئیا کیا ھے؟
ہک بزرگ ٹھڈا ساہ بھر کے آ کھیا بچڑا رکھ ہئی تاں موج ہئی ساڈی۔۔ ہُݨ اپݨے گھر بہہ کے وی بےگھر ھیں رکھ دا رقبہ فوجیں کوں الاٹ تھی گئے،اساں بہوں لڑدے بھڑدے رہ گئے ھیں ساڈی کہیں وی نہی سُݨی الٹا منکیرہ تھاݨے وچ ساڈے خلاف ناجائز پرچے تھنیدے رہ گئے ساڈے بندے ڈھکیج بدھیج گئے۔
اساں موقع تیں الاٹی فوجیں نال جسمانی طور تیں وی لڑے لیکن پوری پولیس تھاݨاں انہاں دے کٹھے ھا ساڈے کجھ بندے زخمی تھئے کجھ کوں پولیس بدھ تھانڑے گھن گئی اساں ایں الاٹمنٹ دے خلاف عدالت وچ وی رٹ کیتی۔ لیکن روز دی تھاݨے پولیس دی کاروائی نال ساڈے لوک تھک پئے لیکن کوئی وی مقامی سیاسی بندہ ساڈے نال نہ تھیا۔
انہاں آکھیا ساڈے مال وکا گئے جمع پونجی تھاݨے پولیس وچ لگ گئی تیں رکھ وی ہتھوں نکل گئی میں پچھیا آ خر ایویں کیوں تھئے ڈوجھے بڈھڑے ٹھڈا ساہ بھر کے آ کھے بچڑا غلطی ساری ساڈی اپنڑی ھے، میں پچھیا بابا تہاڈی کیرھی غلطی ھے اونہہ آ کھیا ڈیکھ نہ اساں تھل وچ چݨے کاشت کریندے نہ انہاں دے ڈڈھ وچ درد پوندا اے ساڈے تھل وچ چݨے دی فصل ڈیہدے گئین اے ساڈے تھل دی زمین دے پچھو پئے گئے ھن۔
میں پچھیا بابا ایں الاٹمنٹ کینے پہلے تہاڈی زندگی کیویں ھئی انہاں آ کھیا رکھ وچ جڈاں ساڈے مال چردے ھن اساں اتھاں بادشاہ ہاسے ساڈی موج ھئی اساں اوکھ ڈٹھا کائینا ھا مال دے نال ٹردے پھردے ہاسے کڈاہیں بیمار وی کائینا تھئے ہاسے۔
سنجا ہک ڈنگر یا لیلا بکری جو ویچ چھوڑوں ھا چھی مہینے تک لتیں وچ سراݨے ڈے کے ستے پئے راہندے ھاسے کہیں شئے دی پرواہ کائینا ہوندی ھئی،میں پچھیا ہُݨ تاں نہر آ ندی پئی ھے خش ہوسوبڈھڑے آ کھیا جی ھا بچڑا بچی کھچی رکھ نہر دے ناں تیں ہتھیکی کر گھنسن اتھاں نہر دی لوڑھ کیرھی ھے میں تہاڈے سامݨے اتھاہیں کاہی دے چار ٹپے مرینداں تلوں پاݨی نکل آسی جیرھے ویلھے ول نہر آ ندی ھے اے تاں پورا تھل سوما تھی ویسی، میڈا بچڑا ول اساں کن ویسوں کوئی پتہ کائینی ؟
ایں دروان چاہ تیں بسکٹ آ گئے چاہ تیں گپ شپ کٹھے چلدی رہی چاہ دے بعد اساں اجازت منگی انہاں کینے روانہ تھی اساں رکھ گوہر آ لے دو پندھ شروع کیتا۔
تھل دے منظر دی چس چݨیں دی ساول تھل وچ ہک بہار لائی پئی ھئی اساں چس نال پندھ کریندے پئے ہاسے ہکی پکی عمر دا بندہ جیرھا سڑک تیں کھڑا ھا ساکوں رُکݨ دا اشارہ کیتا اساں رک گئے اونہہ آ کھیا میکوں گوہر آ لے اڈے تک چاتی جلو
اساں آ کھیا آ ونج چاچا او ساڈے نال گاڈی وچ بہہ گیا، چاچے کینے گزرگزران دا پچھیا تاں جݨے آ کھیا میڈی زمین تاں ھے کائینا اٹھ ڈاہ ڈنگر ھن اللہ دا فرش ھے چر آ ندن حیاتی سوہݨی گزردی پئی ھے میں پچھیا چاچا گوہر آ لے اڈے تیں کیا کرݨ ویندا پئیں ؟ چاچے آ کھیا اے ہفتے کھن دے کٹھے کیتے انڈے ھن انہاں کوں ویچݨ ویندا پیاں ول کوئی سبزی مبزی وی گھدی آ سا ں حال احوال چلدا پئیا ھا اڈا گوہر آ لہ وی آگیا ساکوں وی چاہ پیتے ڈھیر ٹائم گزر گیا ھا اساں وی اوندے نال لہہ گئے اوکوں نال رلا کے ہوٹل تیں چاہ دا آکھیا تیں جوان اپݨے کھیسے وچ ہتھ ماریا آ کھیا تہاکوں تھل دا تحفہ تاں ڈیواں جوان کھیسے وچوں مٹھ بھر کڈھی تاں بھنے چݨے تے بھُنے ٹیٹک دے بیج نال گڑ دی ٹھاپ لگی ہوئی ہایی میکوں تاں وڈی چس آ ئی کیوں جو میڈا تاں اے چھوٹے لا دا ذائقہ ھا اماں ساکوں سیالے کوں ایویں مرونڈے بݨا ڈیندی ھئی صفدر تیں اسد وی کھادے پتہ نہی انہاں کوں کیویں لگے؟